تقریباً 5000 سال پہلاں مصر وچّ نیل دریا دے کنڈھے اک وڈي رہتل پروان چڑھی۔ اس ویلے دی تریخ مورتاں دے لکھتی روپ وچّ لکھی ملدی اے ۔ ایہہ ویلہ فرعوناں دا سی۔ فرعون دا مطلب اے جہڑا محلاں وچّ رہندا اے۔ اس دا مطلبَ بادشاہ سی۔ فرعون اپنے آپ نوں دیوتے دا درجہ دیندے سی۔ اس نوں سبتوں طاقتور سمجھیا جاندا سی۔ اوہناں دا حکم اٹلّ ہندا سی۔ لوک اوہناں نوں مذہبی روپ نال مانتا دندے سن۔ اوہناں دا یعقین سی کہ فرعون کرکے ہی سویر ویلے سورج چڑھدا اے اتے گرمیاں دے انت `تے نیل دریا وچّ ہڑ آؤندا اے۔ اوہ سمجھدے سن کہ نیل دریا دا پانی کسے انجانے اسمان توں آؤندا اے۔ مصری لوکاں دا سارا جیون نیل دریا تے منحصر سی۔ اوہناں لوکاں دا ایہہ وی یعقین سی کہ موت توں بعد فرعون ہی دیوتیاں توں مرن آلے دی روح نوں روٹی پانی دوا سکدا اے۔ قبر وچّ مرن آلے دے نال دھات دیاں بنیاں دیوتیاں دیاں مورتیاں وی رکھدے سن۔ فرعون دا سرکاری رتبہ بہت متبرک سی ۔ اس ویلے کلنڈر وی جاری ہویا۔ فرعوناں دے ویلے نوں عام صور اتے اہرام دے ویلے دے ناں نال یاد کیتا جاندا اے۔
خفو دا وڈا ہرم دنیا دے ستّ پرانے عجوبیاں وچوں اک گنیا جاندا اے۔ ساریاں نالوں حیرانی آلی گلّ ایہہ وے کہ ایہہ ساریاں نالوں پرانا اے اتے ستاں عجوبیاں وچوں صرف ایہی بچیا ہویا اے ۔ ایہہ مصر وچّ قاہرہ دے اک حصے غیزا شہر وچّ واقع اے ۔ اس وڈے اہرام نوں مصری فرعون خوفو نے بنوایا۔ خوفو فرعون خاندان دی چوتھی پیڑھی وچّ تقریباً 2560 قبل مسیح وچّ ہویا۔ اس دا منتوَ سی کہ جدوں اس دی موت ہووے تاں اس نوں اس وچّ دفنایا جائے۔ کیہا جاندا کہ اس اہرام نوں بناؤن وچّ 20 سال لگے۔ اس اہرام دے ڈھانچے وچّ ورتے پتھراں دی گنتی کوئی 20 لکھ اے اتے ہریک پتھر دا عامَ بھار 2 ٹن توں ودھ اے۔ اپر نوں جاندے پتھراں دا سائیز گھٹدا جاندا اے۔ بنیاد دے کئی پتھراں دے بلاک 15 ٹن توں وی زیادہ بھاری ہن۔ بادشاہ دے کمرے دی چھت تے گرینائیٹ دے بلاک 50 توں 80 ٹن بھارے ہن۔ پتھراں نوں گھڑن دی کلا بہت اعلی اے۔ ایہہ پتھر اینی کاریگری نال فٹّ کیتے گئے ہن کہ کوئی وی بریک گتا (کارڈبورڈ) اس وچّ نہیں آ سکدا۔ حالے تکّ ایہہ نہیں پتہ لگّ سکیا کہ ایہہ اہرام لئی ورتے اینے بھاری پتھر اپر کویں پہنچائے گئے۔ کوئی کہندا اے کہ رینپ (ڈھلان) بناکے اس دی ورتوں کیتی گئی ہوویگی اتے کسے دا خیال اے کہ لمبے-لمبے لیوراں (تلاں) راہیں لے جائے گئے ہونگے۔ اجوکے سمیں وچّ ڈاکٹر زاہی حواس نوں اہرام دے دکھنی پاسے اک رینپ ملیا ہے جس توں اندازہ لایا جاندا اے کہ اس اہرام دی اساری لئی اس رینپ نوں ورتیا گیا ہونا اے۔ غیزا دے تھان تے میؤزیئم وچّ خوفو دی اک کشتی وی پئی اے جس نوں ‘سورج کشتی’ کہندے ہن۔ ایہہ مصری خیال اے کہ موت دے پچھوں ایہہ روح دی آواجائی دا زریعہ ہندی اے۔ اس وڈے اہرام دی مڈھلی اچائی 481 فٹّ سی پر ویلے دی مار تھلے آکے ہن ایہہ دس فٹّ دی اچائی گوا چکا اے۔ ایہہ اہرام 19ویں صدی توں پہلاں دے ویلے وچّ دنیا دا سبھ نالوں اچا ڈھانچہ سی۔ اس دا ڈھلانی زاویہ (کون) 51 ڈگری 51 منٹّ ہے۔ تھلے توں ایہہ اہرام مربع شکل وچّ اے۔ اساری وچّ ہر تھاں تے ایہہ شکل اکو جہی رکھی گئی اے۔ ہیٹھاں ہریک پاسہ 751 فٹّ ہے۔ بناوٹ وچّ چارے پاسیاں دی اپر تکّ آپسی تال میل اے۔ اس اہرام دا مونہہ اس طریقے نال بند اے کہ پتہ نہیں لگدا کہ مونہہ کتھے اے۔ اک یونانی سیاح، ہیروڈوٹسّ موجب اس اہرام نوں بناؤن لئی تقریباً اک لکھ غلاماں توں وگار لئی گئی۔ کئی سائنسدان ہیروڈوٹس نال متفق نہیں ہن۔ ہن تکّ 46 اہرام لبھے گئے ہن۔ ہور وی لبھے جا سکدے ہن جہڑے مارو تھلّ وچّ دبے پئے ہن۔ پرانے فن تعمیر دا کمال اس گلّ وچّ اے کہ اہراماں دی اساری دی منتی کمال دی باریک-بینی پیش کردی اے۔ بہت سارے اہراماں وچّ مرتکاں (مرن آلےآں) نال بے انت دھن دولت رکھیا جاندا سی کیونکہ مصری سمجھدے سن کہ موت توں پچھوں مرن آلےآں دی ضرورتاں لئی اس دھن دی لوڑ اے۔ ایسے کارن پرانے ویلے وچّ قبر-لٹیرے ہندے سن۔ اوہ قبراں نوں لٹدے سن۔ اجہیاں وارداتاں دے علاج لئی تعمیر دے ماہر اہرام وچّ اجیہے رستے بناؤندے سن جنہاں نوں گرینائیٹ بلاکاں راہیں بند کیتا جاندا سی اتے خفیہ راہ اتے خفیہ کمرے بنائے جاندے سن پر لٹیرے اوہناں نالوں وی چتر سن۔ اسے لئی بادشاہاں دی کوئی ایسی قبر نہیں اے جہڑی لٹی نہ گئی ہووے۔ 820ء وچّ عربی خلیفہ عبداللہ المنوم نے خوفو دے اہرام دے سبھ خفیہ راہ کھولن دی کوشش کئی طریقیاں نال کیتی۔ اس نوں اک راہ ملیا وی پر کوئی خزانہ نہ لبھّ سکیا۔ اس اہرام وچّ ملکہ اتے بادشاہ دے کمرے ملے۔ حیرانی والی گلّ اے کہ کسے نوں حالے تکّ خوفو دی ممی اتے خزانہ نہیں مل سکے۔ اس توں کاریگراں دے خفیہ تعمیراتی کاریگری دا اندازہ لایا جا سکدا اے۔